Andigan, antargan so bahat dope motor, lek na marsadu (naik bendi) ma halak pala mangalap boru. On peda, marbagas boto si Naknun. Olo, lek jadi do dapotan boru. Boruna ning kalak na lele, na bontar, marsisilon ginjang. Obukna diongen. Ilala….
Ah, tinggal ko Tiara, botimon di bagasan rohana. Roma boru ni tulang na ngon Gonting Salak. Pupu mulbas hodok, pupu dosar taroktokna. Taringot ia bulus Darmendra dohot Hemamalini, laos marlagu di film “Sholay”, hahai….
Di ari ahad, dibulan Syafar, mangalap noru mada tu luat bariba ni Aek Matondang. Najop mada roha si Naknun. Pupu marcikek, pupu dicakukkon mulak suri utu on. Pupu muse iapuskon kapur barus tu baju Gunting Cino on. Ilala, muap uskus sabelok….
Pendek ni carito, dioban ma boru on, marsadu mantong. Saumur, on dope ia manengget sadu. Soni uap ni kapur barus, soni muse uap ni hoda (kudo), marsieket-eketan. Tuk-tak, tuk-tak ning sora ni pat ni hoda. Tuk-tak, tuk-tak ning roha si Naknun muse. Sai langa ni hoda, sai muse mutuk ni indorana.
Nangkan na sa asur-sarosbang mon modom, ning rohana margoso. Hahai…. Pupu isirik boru on, pupu itarik ia parbobat nia. Boru naso unjung ditanda mantong tele, na dipatama-tama ni halak do soni. Hum nida si Naknun parbusaen nai, ala bana mon ning rohana bulus. Suang songon gule kantang dot bodat, eh dot manuk.
Tolap ma borngin. Sada dua doma halak na tinggal. Ditopotkon si Naknun mada boru na lele na bontar na ias bohina i.
“Keta le,” ning si Naknun. “Mur ngol ulala parhosai.”
“Tudia dehe,” ning anak borui homang.
“Bo le, tai ma habis obaran ni boru. Ma ombang do rosbang (tempat tidur) ta pe.”
“Inda au angkangi,” ning anak borui humitir. Asontong nga humitir. Alak do na ipabags, iba muse tumbalna. “Au pandongani do au.”
“Ala… ulang dabo paleam-leam be bagian on, Hasian,” ning si Naknun muse.
“Inda au i angkang. Ngana au manjagit tuhor nai pe.”
Bele-bele soni ro ma anak boru ngon dapor. Na lele do nian, na bontar. Tai pariponna suang songon culok ni arambir, tajom muse. Hum ogos sotik mardaro do iba baeni.
“Au dei angkang, au do boru nai,” ning anak borui. “Tai ita do na sasadu.”
“Inda jau ba,” ning si Naknun muse. Nga songon Hemamalini nida ia. Donokan do nida ia rupo nai songon Amris Puri, bandit ni filim India i le.
“Ita do na sasadu nangkin,” lek ning anak boru.
Ilala, ma sambang kaji, ning roa si Naknun. Hum partata ni anak borui pe binoto do nahurang sakotip muse alakna. Sego saruang, ning roa pala tarutung.
Mandang ngara si Naknun. Inda isia ningia i. Ribut doma, marroan alak sakampung. Ipataru mulak boto anak borui. Loas itimbungkon si Naknun doma lobi-lobi ni kapur barus pe. Anggo si Tiara, hukkek doma ia na tatai sajo. Losi ma au markudo, ning si Naknun.
Admin : Iskandar Hasibuan